Ikinyamakuru cya leta muri Ethiopia kiratangaza ko impanuka y’indege ya kajugujugu ya gisirikare yaguyemo abantu 18 barimo abana 2.
Umuyobozi muri polisi, Aschalew Alemu yabwiye Ibiro Ntaramakuru bya Ethiopia ko iyi mpanuka yabaye mu gitondo cyo kuri uyu wa Kane mu karere ka Oromia.
Iyi ndege yo mu bwoko bwa kajugujugu y’Igisirikare cya Ethiopia yari iturutse mu mujyi wa Dire Dawa uri mu burasirazuba, igana ku birindiro by’ingabo zirwanira mu kirere mu mujyi wa Bishoftu uri mu majyepfo y’uburasirazuba bw’umurwa mukuru, Addis Abeba.
Aschalew yavuze ko icyateye iyi mpanuka kitaramenyekana ariko hatangiye iperereza.
Ikinyamakuru gikorana bya hafi na leta, Fana Broadcasting Corporate, cyatangaje ko mu baguye muri iyi mpanuka, 15 ari abasirikare mu gihe abandi batatu ari abasivili.
