Abayobozi ba Ethiopia bavuga ko bisubije imijyi itari mike mu Ntara ya Amhara yari yarigaruriwe n’inyeshamba za Tigray kuva mu mpeshyi ishize. Minisitiri w’Itangazamakuru, Legesse Tulu yabwiye abanyamakuru kuri uyu wa Gatandatu ko imijyi ya Haran, Gobye, Robit Kobo na Woldiya iri mu maboko ya Leta. Inyeshamba za Tigray ntacyo ziravuga, ariko mu minsi ishize zari zatangaje ko ziri gusubira inyuma kugira ngo zisuganye, zigabe ibitero simusiga. Biragoye kwemeza amakuru atangwa na Leta cyangwa ibitangazamakuru biri mu kwaha kwayo. Ibi bitewe n’uko ibinyamakuru byabujijwe kuvuga uko urugamba rwifashe mu gihe abanyamakuru babikoze bafungwa. Ku rundi ruhande, TPLF nayo ntabwo icyumvikana mu bitangazamakuru igira icyo ivuga ku biba byatangajwe na Leta yigamba instinzi.
