Ambasade ya Leta Zunze Ubumwe za Amerika muri Ethiopia, yatangaje ko mu murwa mukuru w’iki gihugu, Addis Ababa no mu bindi bice hashobora kugabwa igitero cy’iterabwoba.
Ni ubutumwa yahaye abenegihugu ba USA bakiri muri Ethiopia, muri iki gihe ingabo za Leta zihanganye n’imitwe yitwaje intwaro iyirwanya irimo TPLF, iharanira ubwigenge bw’akarere ka Tigray.
Yabasabye kwiyandikisha muri porogaramu yitwa STEP (Traveler Enrollment Program), bazajya bakurikiraniraho amakuru mashya ajyanye n’umutekano muri iki gihugu.
Iyi mitwe yitwaje intwaro bivugwa ko ikomeje gusatira umurwa mukuru, bikaba byatumye Minisitiri w’Intebe, Abiy Ahmed yiyemeza kujya kwifatanya n’ingabo za Leta kuri uru rugamba.
Intambara y’ingabo za Leta n’imitwe yitwaje intwaro yatangiriye muri Tigray mu Gushyingo 2019. Impande zombi zahisemo gukomeza guhangana, aho gushyira imbere ibiganiro by’amahoro.
