‎Ethiopia yahambirije abadipolomate 6 ba Sudani

Ethiopia yategetse abadipolomate batandatu ba Sudani kuva muri icyo gihugu, nk'uko byatangajwe n'umuyobozi mukuru muri Ethiopia kuri uyu wa Gatatu, ibigaragaza ko umubano hagati y'impande zombi ukomeje kwangirika bitewe n'ibirego buri ruhande rurega urundi.
‎
Sudani ishinja Ethiopia gushyigikira inyeshyamba za Rapid Support Forces, mu gihe Ethiopia ishinja Sudani gushyigikira inyeshyamba zo mu Ntara ya Tigray, iherereye mu majyaruguru y'igihugu.
‎
‎Ibi birego bivuguruzanya, impande zombi zihakana, byateye ubwoba ko intambara mu bihugu byombi zishobora kuvamo amakimbirane akomeye mu Ihembe rya Afurika.
‎
‎Ku Cyumweru, Guverinoma ya Sudani yavuze ko yashyikirije Ethiopia ikirego mu Kanama k’Umutekano k’Umuryango w’Abibumbye n’Akanama k’Umutekano k'Umuryango wa Afurika Yunze Ubumwe, ishinja Ethiopia kwemerera RSF gukoresha ubutaka bwayo mu koherza indege zitagira abapilote kurasa ibikorwa remezo bya gisivili muri Sudani.
‎
Umuvugizi w’ibiro bya Minisitiri w’Intebe wa Ethiopia ntiyahise asubiza icyifuzo cya Reuters cyo gutanga ibisobanuro. Ethiopia yategetse abakozi batandatu ba Ambasade ya Sudani iri mu mujyi wa Assosa uhana imbibi n’umupaka, kuhava mu masaha 48, nk’uko byatangajwe n’umuyobozi mukuru muri Ethiopia, ariko nta mpamvu yatanze y’icyo cyemezo.
‎
‎Usibye Sudani, igihugu cya Ethiopia gishinja kandi Misiri na Eritrea gushyigikira inyeshyamba zo muri Tigray, zubuye ibitero ku ngabo za leta muri Nzeri. Ibyo bihugu byose uko ari bitatu byahakanye ibyo birego.
‎