Ikigo gishinzwe Itangazamakuru muri Ethiopia (EMA) cyanze kongera uburenganzira bwo gukorera mu gihugu ku banyamakuru batatu b’Ibiro Ntaramakuru by’Abongereza (Reuters) bari bafite icyicaro i Addis Abeba.
EMA kandi yambuye ibi biro ntaramakuru, uburenganzira bwo gukurikirana inama ya 39 y’Umuryango wa Afurika Yunze Ubumwe, yabereye mu murwa mukuru wa Ethiopia ku itariki ya 14-15 Gashyantare.
Iki cyafashwe nyuma y’iminsi mike Ibiro Ntaramakuru Reuters bisohoye raporo y’icukumbura ivuga ko Ethiopia yubatse inkambi y’ibanga itorezwamo abarwanyi ibihumbi b’umutwe wa Rapid Support Forces urwanya ubutegetsi mu gihugu cy’abaturanyi cya Sudani.
Ethiopia ntacyo yatangaje ku mugaragaro kuri aya makuru.
Mu gihe EMA yerekanye ko inkuru yo ku itariki ya 10 Gashyantare ya Reuters yatumye ifata iki cyemezo, nta byinshi yatangaje ku mugaragaro.
Mu itangazo ryayo, Reuters yagize iti: “Reuters iri gusuzuma iki kibazo kandi izakomeza gukurikirana Ethiopia mu buryo bwigenga, butabogamye kandi bwizewe mu rwego rwo kubahiriza amahame ya Thomson Reuters.”
