Ikipe ya AS Kigali ibifashijwemo n’Umurundi Shaban Hussein ‘Tchabalala’, yatsinze Etincelles ibitego 2-1 ikomeza kuyobora itsinda C.
Abanyamujyi bari bakiriye Etincelles mu mukino wa gatatu wo mu tsinda C wabereye kuri Stade Amahoro i Remera, ari na wo usoza imikino ibanza yo muri ririya tsinda.
Ibitego bibiri byo mu gice cya mbere cy’umukino by’Umurundi Shaban Hussein byari bihagije ngo AS Kigali itsinde Etincelles ibitego 2-1, ikomeza kuyobora itsinda n’amanota 9 nyuma yo kurangiza imikino ibanza nta n’umwe itsinzwe.
Etincelles yabonye impozamarira ku munota wa 60 w’umukino ibifashijwemo na Shaban Hassan.
Tchabalala nyuma yo gutsinda ibitego bibiri mu mukino AS Kigali yatsinzemo Musanze ibitego 4-2, ndetse no gutsinda igitego kimwe mu mukino AS Kigali yatsinzemo Police FC ibitego 2-0, yahise yuzuza ibitego bitanu amaze gutsinda.
Etincelles nyuma yo gutsindwa imikino itatu yose ibanza iri ku mwanya wa nyuma n’ubusa bw’amanota.
Undi mukino wo muri iri tsinda wabaye ni uwa Police FC yagiye gutsindira Musanze FC kuri Stade Ubworoherane igitego 1-0, ihita ifata umwanya wa kabiri n’amanota atandatu.
Mu tsinda D ikipe ya Sunrise yatsinze Espoir FC ibitego 2-0, mu gihe Marines FC yaguye miswi na Mukura VS 0-0.
