Urwego rw’Umuryango w’Ubumwe bw’Uburayi rushinzwe kugenzura ubuziranenge bw’imiti, EMA, kuri uyu wa 11 Werurwe 2021 rwagaragaje ko nta mpamvu y’uko ibihugu byakomeza guhagarika urukingo rwa Covid-19 rwa AstraZeneca.
Ni nyuma y’iperereza ry’ibanze uru rwego rwakoze ubwo ibihugu bigize uyu muryango nka: Denmark, Iceland, u Butaliyani, Luxembourg, Autriche, Estonia, Latvia, Lithuania, na Norvège byari bimaze kuruhagarika, bigaragaza ko bitewe impungenge n’abarutewe bagaragaza ibibazo birimo kuvura kw’amaraso (blood clots).
EMA mu nkuru dukesha BBC yagize iti: “Ubu nta kigaragaza ko uru rukingo rwateye ibi bibazo bidasanzwe biri ku rutonde rw’ibimenyetso by’inkurikizi byarwo. Ingaruka nziza z’urukingo zikomeje kuba nyinshi kurusha imbi ndetse urukingo rwakomeze gukoreshwa mu gihe iperereza kuri ibi bibazo rikomeje.”
Ikigo AstraZeneca gikora uru rukingo nacyo kuri uyu wa 11 Werurwe cyamaze impungenge abo rukomeje gutera ubwoba, by’umwihariko ibihugu byaruhagaritse by’agateganyo.
Iki kigo cyagize kiti: “Inzego zikora ubugenzuzi zifite imikorere isobanutse kandi ihamye mu kugenzura imiti mishya irimo urukingo rwa Covid-19 AstraZeneca. Umutekano w’uru rukingo wakozweho ubushakashatsi bwimbitse mu mageregeza yakozwe mu byiciro bitatu kandi amakuru yavuyemo yerekana ko urukingo nta kibazo ruteye.”
BBC ivuga ko abantu babarirwa muri miliyoni eshanu ari bo bamaze guterwa urukingo rwa AstraZeneca, abamaze kugaragaza ibibazo bikomeye nko kuvura kw’amaraso ni 30.
Kurikira ibiganiro n’amavidewo binyura kuri Bwiza TV
