Ikipe y’Igihugu ya Espagne, La Furia Roja, yabaye iya mbere igeze muri 1/2 cy’irangiza cya Euro 2020, nyuma yo gusezerera u Busuwisi kuri penaliti 3-1.
Amakipe yombi yari yarangije iminota isanzwe y’umukino ndetse na 30 y’inyongera anganya igitego 1-1.
Espagne yafunguye amazamu ku munota wa 8 ku ishoti Jordi Alba yatereye hanze y’urubuga rw’amahina, umupira uyobywa na myugariro Denis Zakaria mbere yo kuruhukira mu izamu.
Abasuwisi bishyuye iki gitego ku munota wa 68 w’umukino binyuze kuri Xerdan Shaqir wari Kapiteni wabo, mbere y’uko Remo Freuler ukina hagati mu kibuga yerekwa ikarita itukura.
Muri rusange Espagne yarushaga Abasuwisi mu mpande zose z’ikibuga, gusa iberwa ibamba n’umunyezamu Yann Sommer wakuragamo imipira ya barutahizamu bayo.
Mu mashoti 28 iyi kipe y’umutoza Luis Enrique yagerageje, 10 muri yo yaganaga mu izamu gusa yose akurwamo n’uriya munyezamu.
Espagne izahurira muri 1/2 cy’irangiza n’ikipe irokoka hagati y’u Bubiligi n’u Butaliyani.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
