FARDC iri guha abasivile intwaro ngo bayifashe guhangana na M23

Igisirikare cya Repubulika Iharanira Demokarasi ya Congo (FARDC), cyatangiye guha intwaro abaturage bo muri Teritwari ya Masisi kugira ngo bagifashe guhangana n’inyeshyamba za M23 bari kurwana.

Mu ntangiriro z’iki cyumweru ni bwo imirwano ikomeye yongeye kubura hagati y’impande mu bice bitandukanye bya Teritwari za Rutshuru na Masisi.

Ni imirwano FARDC nk’ibisanzwe iri gufatanyamo n’imitwe itandukanye irimo FDLR bamaze igihe bakorana, ndetse n’abacancuro baturutse ku mugabane w’u Burayi.

Perezida wa M23, Bertrand Bisimwa abinyujije ku rubuga rwe rwa Twitter; yamaganye FARDC n’abo bakorana ku bwo guha intwaro abaturage b’i Masisi kugira ngo binjire muri iriya ntambara.

Yavuze ko ikigamijwe ari ugukoresha abaturage nk’ibitambo kugira ngo abe ari bo batikirira ku rugamba.

Ati: “Ihuriro rya guverinoma [rigizwe na] FARDC, FDLR, Mai-Mai n’abacancuro, ryahaye intwaro abaturage bo mu duce twose dukikije Kitchanga muri Masisi kugira ngo babe ingabo zikingira abasirikare. Ubu bunyamaswa bakorera abaturage babeshya ko barinda ntabwo byemewe.”

FARDC yatangiye kwinjiza abaturage mu ntambara yayo na M23, nyuma y’igihe gito Minisitiri w’Ububanyi n’Amahanga wa RDC, Christophe Lutundula, atangaje ko Congo yiteguye kurangiza intambara ihanganyemo na M23 ku kiguzi icyo aricyo cyose.

Ni ibikubiye mu itangazo aheruka gusohora asaba ko M23 n’u Rwanda rushinjwa kuyiha ubufasha ko bafatirwa ibihano mpuzamahanga, nyuma y’uko abarwanyi b’uriya mutwe banze kuva mu duce bigaruriye nk’uko babisabwe.

Lutundula yashimangiye amagambo Tshisekedi yavugiye muri Loni mu mwaka ushize agira ati: “Twebwe abaturage ba Congo twiyemeje kuri iyi nshuro gushyira iherezo ku mutekano muke mu Burasirazuba bw’igihugu cyacu, ku kiguzi byasaba cyose.”

Baromètre sécuritaire du Kivu ivuga ko kuva ku wa Mbere w’iki Cyumweru M23 yarimo yigarurira ibice bitandukanye bya Teritwari ya Masisi, nyuma y’imirwano ikomeye n’uruhande rw’Ingabo za Congo.

Kugeza ku mugoroba wo ku wa Gatatu uru rubuga rwavugaga ko ziriya nyeshyamba zari zamaze kwigarurira imidugudu itandukanye irimo Kilolirwe, Burungu na Kitshanga, ndetse zikaba zari zanashoboye gucamo kabiri umuhanda uhuza Kitshanga na Goma.