Igisirikare cya Repubulika Iharanira Demokarasi ya Congo (FARDC), cyatangaje ko cyishe ibyihebe 19 byo mu mutwe witwaje intwaro wa ADF; na ho 21 bifatwa mpiri.
Ibi byihebe byiciwe mu gace ka Walese-vonkutu ho muri Teritwari ya Mambasa mu ntara ya Ituri.
Umuvugizi w’Igisirikare cya Congo Kinshasa muri Ituri, Lieutenant Jules Ngongo, yabwiye itangazamakuru ryo muri kiriya gihugu ko ADF yatakarije bariya barwanyi bayo muri Operasiyo zakozwe kuva ku itariki ya 01 kugeza ku ya 20 Gicurasi muri turiya duce.
Yavuze ko usibye kwica no gufata biriya byihebe, hanafashwe imbunda n’amasasu menshi.
Ati: “Twishe abarwanyi barenga 19 b’uriya mutwe witwaje intwaro, ariko nanone twanafashe 21 bawugize birirwa bazerera, ikaba impamvu bica abaturage.”
Lieutenant Ngongo yavuze ko Igisirikare cya RDC cyamaze gufata umwanzuro wo gukora imikwabu ihoraho cyifashishije imodoka, mu rwego rwo kwemerera abaturage gukora urujya n’uruza.
