Filimi yiswe Imbunda 27 cyangwa se ‘ 27 Guns ’ igaragaza urugamba rwo kubohora Uganda rwa Perezida Museveni ikomeje kwerekanwa mu nzu za cinema zitandukanye muri nka Cinema Magic na Metroplex Mall muri Kampala. Iyi filimi yagiye ahagaragara bwa mbere kuwa 08 Nzeri ishingiye ku rugamba rwa NRA rwo kubohoza Uganda nubwo hari bimwe irimo kunengwamo.
Iyi filimi igaragaza abarwanyi bakiri bato bari bafite disipuline n’umuhate n’umutima w’ubwitange babashije guhaguruka bagatangiza urugamba rwa guerilla bakarwanya ubutegetsi bw’igitugu bwakandamizaga abaturage bunabica.
Iyi filimi yeretswe bwa mbere rubanda kuwa 13 Nzeri, izakomeza kwerekanwa hirya no hino mu gihe cy’ibyumweru bitatu bayimenyekanisha.
Igaragaramo abasore bari bafite imbunda 27 zonyine bagabye igitero ku kigo cya gisirikare cya Kabamba mu Karere ka Mubende kuwa 06 Gashyantare 1981, ari nabwo hatangiraga byeruye urugamba rwo guhirika guverinoma za Apollo Milton Obote na Tito Okello Lutwa.
Iyi filimi y’amasaha 2;30 ikwereka ingamba zahuje inyeshyamba n’ingabo za guverinoma zaje kugeza NRA ku butegetsi kuwa 26 Mutarama 1986. Nubwo iyi filimi ifite amashusho meza n’amajwi, ngo ntikwereka neza ishusho nyayo y’ibintu bimwe byabaye mu gihe cy’urugamba nk’uko The East African dukesha iyi nkuru ivuga.
Urugero, ngo ntiharagaramo inyeshyamba zambaye imyenda yakoreshejwe kandi yacikaguritse, ndetse ntihagaragaramo abana bazwi nka ba kadogo bagize uruhare runini cyane muri uru rugamba.
Iyi filimi kandi igaragaramo ukina ari Milton Obote ageza ijambo ku bakozi be ku meza ye hari telephone ngendanwa, mu gihe ngo icyo gihe ikoranabuhanga rya telephone ngendanwa ryari ritaragera muri Uganda.
Ikindi kinengwa muri iyi filimi ni umuntu ukina Kiiza Besigye akanakina Dr Ronald Bata icya rimwe. Ngo hari na scene zagiye zigirwa ndende atari ngombwa. Urugero akaba ari scene y’abantu baba bishwe n’ingabo za leta biciwe mu murima hatasobanuwe ndetse ntihagaragare subtitles.
Iyi filimi ‘ 27 Guns ‘ ikinwa mu Cyongereza, Igiswahili, Uluganda n’Urunyankole ndetse inafite subtitles z’icyongereza.
Abakinnyi b’imena ni Arnold Mubangizi ukina ari Museveni, Diana Kamuntu ukina ari Janet Museveni, Jonnie Magyezi ukina ari Fred Rwigema, Ayent T. Steve ukina ari Maj Gen. Julius Oketta, Kenny Katuramu ukina ari Pecos Kutesa, Sezi Jedediah Nuwewenka ukina ari Salim Saleh na Jenkins Mutumba ukina ari Elly Tumwine.
Ni filimi yayobowe n’umukobwa wa Museveni, Natasha Karugire ndetse na Sharpe Ssewali. Karugire iki gitekerezo akaba yaragiye mu gitabo cya perezida Museveni yise ‘ Sowing the Mustard Seed ’
