Imibare y’agateganyo y’ibyavuye mu matora y’abadepite 53 yatangajwe na Komisiyo y’Igihugu y’Amatora yerekana ko Umuryango FPR Inkotanyi watowe n’abantu 5.471.104 bangana na 62,67%.
Abadepite 53 batowe ku wa 14 Nyakanga 2024 ku Banyarwanda baba mu mahanga, no ku wa 16 Nyakanga 2024 ku Banyarwanda bari imbere mu Gihugu.
Muri rusange ibikorwa by’amatora byagenze neza, haba ku Banyarwanda baba mu mahanga ndetse n’imbere mu Gihugu.
Ku bantu bagombaga gutora bagera kuri 9.071.157, amajwi amaze kubarurwa mu matora rusange y’Abadepite angana na 8.761.453, bingana na 96,60% .
Ishyaka rya PL ryo ryatowe n’abantu 957.602 bangana n’amajwi 10,97%, naho PSD yatowe n’abantu 827.182 bangana na 9,48% by’amajwi.
Ishyaka Riharanira Demokarasi no Kurengera Ibidukikije (DGPR – Green Party), ryo ryatowe n’abantu 462.290, bangana na 5,30%.
Ishyaka PDI ryo ryatowe n’abantu 507.474 bangana na 5,81%, mu gihe PS Imberakuri yatowe n’abantu 459.526 bangana na 5,26%.
Umukandida wigenga Nsengiyumva Janvier yatowe n’abantu 44.881 bangana na 0,51%.
Komisiyo y’Igihugu y’Amatora itangaza ko ibarura ry’amajwi mu matora ya Perezida wa Repubulika n’Abadepite rikomeje, kandi ko iyo Komisiyo izakomeza gutangaza ibyavuye mu matora.
Bitarenze itariki ya 20 Nyakanga hazatangazwa by’agateganyo ibyavuye mu matora ya Perezida wa Repubulika n’ay’Abadepite, na ho ku ya 27 Nyakanga hatangazwe amajwi ya burundu.
