Gambia irasaba iperereza ryimbitse ku rupfu rw’umuhungu w’Umudipolomate wayo warasiwe muri USA

Polisi yo mu mujyi wa Senville ivuga ko Momodou Lamin Sisay w’imyaka 39 y’amavuko yazamuye imbunda ye akarasa ku ba polisi na bo bamurasa birwanaho ahita apfa, gusa ibi bikamaganirwa kure n’umunyamategeko Abdul Jaiteh w’umuryango wa Sisay.

Ubu busabe bwa Gambia buje nyuma y’amagambo atandukanye abaturage b’iki gihugu banditse ku mbuga nkoranyambaga, bakinenga kutagira icyo gikora mu maguru mashya ku rupfu rw’akarengane umuturage wa Gambia yahuye na rwo.

Madi Jobarteh usanzwe azwiho kuba impirimbanyi y’uburenganzira bwa muntu muri Gambia, yatangije inyandiko isinyweho n’abantu batandukanye(petition) igamije kwerekana akababaro abaturage batewe n’urupfu rwa Sisay, ikazashyikirizwa ambasade ya Leta Zunze Ubumwe z’Amerika mu murwa mukuru i Banjul kuri uyu wa Mbere ndetse ‘Guma mu Rugo’ yaba yadohowe hakanakorwa imyigaragambyo kuri iyi ambasade.

Umubyeyi w’uyu muhugu wishwe,bLare Sisay yakoreye Umuryango w’Abibumbye mbere y’uko ajya mu kiruhuko cy’izabukuru. Aganira na Fatu Network, ikinyamakuru cyo muri Gambia, yavuze ko umuhungu we yakundaga gusenga cyane ngo kuko amasengeaho 5 yose abayisilamu basenga yayakoreraga mu musigiti. Yagize ati: “Nta myitwarire iteje impungenge nari muziho,nta hohoterwa iryo ari ryo ryose yishoragamo.”

Minisiteri y’Ububanyi n’Amahanga muri Gambia yasohoye itangazo rivuga ko yamaze gusaba amasaderi wa Gambia muri Leta Zunze Ubumwe z’Amerika, kuganira n’impande bireba zirimo n’inzego za Leta bagashakira Sisay ubutabera binyuze mu iperereza ryimbitse ku rupfu rwe.