Ikipe ya Gasogi United yemeje Umugande Kiwanuka Paul nk’umutoza wayo mukuru by’agateganyo.
Iyi kipe yemeje aya makuru mu butumwa yanditse kuri Twitter yayo.
Paul Kiwanuka agomba kungirizwa na Dusange Sacha nk’uko Gasogi United yakomeje abitangaza.
Aba batoza bombi basimbuye umunya-Misiri Ahmed Adel wari umutoza mukuru wa Gasogi United ndetse na Bahaaeldin Ibrahim wari umwungiriza we baheruka gutandukana n’iriya kipe ku bwumvikane.
Muri Nyakanga uyu mwaka ni bwo Gasogi United yari yatangaje Abdel Ahmed na mugenzi we nk’abatoza bayo bakuru, nyuma yo kubasinyisha amasezerano y’umwaka umwe.
Byari nyuma yo gutandukana n’Umukongomani Guy Bukassa wari usanzwe ari umutoza wayo mukuru kubera umusaruro muke, dore ko mu mwaka ushize w’imikino iyi kipe yasoje shampiyona iri ku mwanya wa 11.
Bariya banya-Misiri birukanwe nyuma y’umukino w’umunsi wa karindwi wa shampiyona Gasogi United yatsinzwemo na AS Kigali igitego 1-0 ejo ku Cyumweru.
Ni ibyatumye iyi kipe igumana 10 kuri 18, dore ko mu mikino itandatu yari imaze gukina yatsinzemo itatu igatsindwa ibiri; na ho umwe ikaba yarawunganyije.
Paul Kiwanuka yatoje amakipe arimo Soltilo Bright Stars, Busoga United, Vipers Sports Club, Busiro na Kyadondo zose zo muri Uganda.
