Nibura abantu 23 bishwe n’ibisasu indege z’intambara za Israel zarashe muri Gaza kuri iki cyumweru. Nk’uko byatangajwe n’abaganga muri Palestine .
Kimwe cya kabiri cy’abantu bapfuye baguye mu majyaruguru y’iyi ntara aho Israel ivuga ko irasa mu rwego rwo kubuza abarwanyi b’umutwe wa Hamasi kwisuganya.
Ku ruhande rwabo, Abanyepalestina baravuga ko ibi bitero by’indege z’intambara n’ibigabwa n’ingabo za Israel zirwanira ku butaka ari ‘jenoside’ nk’uko tubikesha Ijwi rya Amerika.
Baravuga bigamije kumaraho abaturage bo mu mijyi ibiri yo mu ntara ya Gaza mu rwego rwo kugirango habe akarere kadatuwe kameze nk’urukuta hagati ya Israel n’ahandi hatuwe muri Palestina.
Ibi Israel yo ibitera utwatsi igashimangira ko ikurikiranye abarwanyi b’umutwe wa Hamas bagaba ibitero bavuye muri utwo turere.
Abaganga baravuga ko abandi banyepalestina 13 baguye mu bitero binyuranye mu mazu yo mu mijyi ya Lahiya na Jabalia ahabarizwa inkambi y’impunzi nini kurusha izindi zirindwi zisigaye.
