Umunyapolitiki Laurent Gbagbo nyuma yo kugaruka mu gihugu cya Côte d’Ivoire yahoze abereye Perezida, yahise yaka gatanya na Simone Ehivet Gbagbo bari bamaranye imyaka irenga 30.
Gbagbo ufatwa nka Perezida wa Côte d’Ivoire wari ukunzwe n’abaturage mbere yo gusimburwa na Alassane Ouattara, yagarutse muri Côte d’Ivoire ku wa Kane w’icyumweru gishize; nyuma y’imyaka 10 yari amaze afungiye muri gereza y’Urukiko Mpuzamahanga Mpanabyaha (ICC) y’i La Haye mu Buholandi.
Mu 2010 nibwo imvururu zatangiye muri Côte d’Ivoire nyuma y’amatora yatsinzwemo na Perezida Ouattara, gusa yanga kuva ku butegetsi biba ngombwa ko abuvanwaho ku ngufu.
Muri izo mvururu zo kwanga kuva ku butegetsi, abasaga 3000 barishwe, ari na bwo Gbagbo yafatwaga yoherezwa muri ICC muri 2011.
Mu 2019 yagizwe umwere ku byaha byibasiye inyokomuntu yaregwaga, urukiko ruvuga ko ubushinjacyaha butigeze bugaragaza ibimenyetso bifatika.
Ni icyemezo ubushinjacyaha bwajuririye, ariko muri Mata uyu mwaka Gbagbo yongera kugirwa umwere.
Nyuma yo kugera muri Côte d’Ivoire Laurent Gbagbo yahise atanga ikirego asaba gutandukana n’umugore we, nk’uko RFI dukesha iyi nkuru yabitangaje.
Itangazo ryasohowe n’umwe mu banyamategeko ba Gbagbo, Claude Menneton, rivuga go uyu wahoze ari Perezida wa Côte d’Ivoire yahisemo kwiyambaza ubutabera, nyuma y’uko umugore we yanze ko batandukana ku bwumvikane.
Gbagbo yatanze ikirego asaba gatanya, mu gihe hari hashize amezi abiri bihwihwiswa ko ashobora gutandukana n’uriya mugore we babanye bwa mbere mu 1989.
Amakuru avuga ko Gbagbo ateganya kurongora umunyamakurukazi akanaba umukunzi we w’igihe kirekire, Nady Bamba.
Kurikira ibiganiro n’amavidewo binyura kuri Bwiza TV
