Gen. John Numbi umaze igihe ahigishwa uruhindu yaba ari kumwe na M23 ku rugamba

Sosiyete Sivile yo mu ntara ya Kivu y’Amajyaruguru yatanze impuruza y’uko Gen. John Numbi umaze igihe ahigishwa uruhindu n’inzego zitandukanye muri Repubulika Iharanira Demokarasi ya Congo yaba ari kumwe n’umutwe wa M23 uri mu mirwano na FARDC.

Sosiyete Sivile yo muri Kivu y’Amajyaruguru yatangaje ibi kuri uyu wa Gatandatu tariki ya 29 Ukwakira, biciye muri John Banyene usanzwe ari Perezida wayo. Uyu yavugaga ku nyeshyamba za M23 zikomeje kwigarurira uduce hafi ya twose two muri Teritwari ya Rutshuru.

Banyene yagize ati: “Bamaze kugota uduce dutandukanye muri Teritwari ya Rutshuru, ariko Ingabo z’inkoramutima ntiziracika intege. Mu bikorwa byabo by’ubugizi bwa nabi, abanzi bungukiye ku bufasha bwa Gen John Numbi uhigishwa uruhindu ndetse n’andi mabandi ashakishwa na RDC kuri ubu ari muri Bunagana.”

Kuva mu gitondo cyo kuri uyu wa Gatandatu M23 iri kugenzura uduce turimo Kiwanja na Centre ya Rutshuru aho bivugwa ko yahise inashyira inzego nshya z’ubuyobozi.

Ni nyuma yo gukubita inshuro Ingabo za Congo Kinshasa bamaze icyumweru kirenga bongeye kubura imirwano.

Gen. John Numbi bivugwa ko uri kumwe n’abarwanyi b’uriya mutwe, yahoze ari Umuyobozi Mukuru wa Polisi ya Congo Kinshasa mbere yo kugirwa Umugenzuzi w’Ingabo za kiriya gihugu (FARDC).

Uyu musirikare w’imyaka 60 y’amavuko amaze igihe ashakishwa n’ubutabera bwa gisirikare muri Congo Kinshasa bumukurikiranyeho kugira uruhare mu rupfu rw’impirimbanyi Floribert Chebeya ndetse n’uwari umushoferi we Fidèle Bazana.

Aba bombi biciwe i Kinshasa muri Kamena 2010.