Binyuze muri telegaramu yashyizweho umukono ku ya 8 Mata ikanashyirwa ku mugaragaro ku ya 11 Mata, Umugaba Mukuru w’Ingabo za Repubulika ya Demokarasi ya Congo (FARDC), Gen. Célestin Mbala, yashyizeho by’agateganyo Brig. Gen. Robert Kasongo Maloba (uri ku ifoto) ngo asimbure Komanda wa Sokola 1 Grand Nord ya FARDC.
Umuyobozi mushya ushinzwe ibikorwa Sokola 1, wayoboraga akarere k’ibikorwa ka Ituri mbere yuko ashyirwaho, asimbuye kuri uwo mwanya Brig. Gen. Mputela Kolito wari uri kuri uyu mwanya kuva muri Gicurasi 2021.
Brig. Gen. Mputela, uvuye i Beni, yahamagajwe n’ubuyobozi bwe i Kinshasa, mu gihe hagitegerejwe ko ahabwa inshingano nshya mu gihe Brig. Gen. Nyembo Abdallah yafashe by’agateganyo ubuyobozi bw’akarere k’ibikorwa bya gisirikare muri Ituri.
Ku Mugaba Mukuru bwa FARDC, iki cyemezo cyafashwe ku mpamvu zo kurushaho kunoza akazi nk’uko tubikesha urubuga politico.cd rwo muri Congo.
Iyi nkuru yibutsa ko mu nama ya mirongo ine na karindwi y’Inama y’Abaminisitiri, Minisitiri w’ingabo z’igihugu ndetse n’abahoze mu gisirikare, Gilbert Kabanda yashimangiye ko byagaragaye ko hari ibitaragenze neza, nyuma y’igitero cya M23 cyibasiye ibirindiro bya FARDC, ku rwego rw’ubuyobozi bw’ingabo muri Kivu y’Amajyaruguru.
Kubw’ibyo, Perezida wa Repubulika akaba n’Umugaba w’Ikirenga w’Ingabo za Repubulika ya Demokarasi ya Congo (FARDC), Félix-Antoine Tshisekedi, yategetse ko hahindurwa ubuyobozi bw’ingabo muri Kivu y’Amajyaruguru, kugira ngo hakemuke ikibazo cyatewe n’intege nke zagaragaye ngabo nyuma y’igitero giheruka cya M23.
