Gen Min Aung Hlaing, wafashe ubutegetsi mu kwezi kwa kabiri ahiritse ubwari buriho muri Myanmar, yigize Minisitiri w’intebe anavuga ko abamurwanya bakwirakwiza Covid19 mu gihugu. Uyu mutegetsi kandi yongereye ubutegetsi bwo mu bihe bidasanzwe ubu bushobora kugeza mu kwezi kwa munani mu 2023. Mu ijambo ryamaze isaha imwe, Gen Min Aung Hlaing yasezeranyije gukoresha “amatora anyuze mu bwisanzure no mucyo ahuriwemo n’amashyaka menshi”, ariko yanise ishyaka yahiritse ku butegetsi “abaterabwoba”. Abantu babarirwa mu magana bapfiriye mu myigaragambyo ikomeje kuba mu gihugu yo kwamagana ihirikwa ry’ubutegetsi ryakozwe n’igisirikare. Abigaragambya benshi bakoraga mu rwego rw’ubuvuzi, ubu rwasenyutse mu gihe hari ubwiyongere bwinshi bw’ubwandu bwa Covid-19. Kuri televiziyo y’igihugu, Gen Hlaing, yashinje abamagana kuba yarahiritse ubutegetsi, avuga ko barimo gukwirakwiza Covid-19 ku bushake. Yavuze ku “makuru y’ibinyoma n’amakuru ayobya ku mbuga nkoranyambaga” ku ngamba za leta ye zijyanye na Covid-19, avuga ko ari “igikoresho cy’iterabwoba rishingiye ku dukoko twanduza”. Umunyamakuru wa BBC Jonathan Head uri i Bangkok mu murwa mukuru wa Thailand, avuga ko ibi bikubiye mu ijambo ridasanzwe, yanavuzemo ko hacyenewe guhinga ipamba kurushaho n’ibitunguru, anamagana abagerageza gusenya leta n’imigenzo ya Myanmar. Kurikira ibiganiro n’amavidewo binyura kuri Bwiza TV
