Gen Numbi wayoboye Polisi y’Igihugu yaba yarahunze

Nk’uko tubikesha Politico, Kapiamba uyoboye umuryango ACAJ uharanira ko buri wese ahabwa ubutabera yagize ati: “Gen John Numbi yahungiye muri Zimbabwe mu byumweru bibiri bishize. Ushinzwe umutekano we, Lunda wa Ngoie yatawe muri yombi. Guverinoma y’Abanyekongo m’umuryango mpuzamahanga bagomba gusaba byihuse Zimbabwe ikamugarura.”

Gen. Numbi ni umwe mu bakuriye inzego z’umutekano bakomeye bavugwaho uruhare mu rupfu rwa Floribert Chebeya wari umuyobozi w’umuryango uharanira uburenganzira bwa muntu wa La Voix des Sans Voix n’umushoferi we Fidèle Bazana, bishwe mu myaka 11 ishize.

Bivugwa ko ku munsi Chebeya [na Bazana] yiciweho, Gen Numbi wari umuyobozi wa Polisi yamutumiye mu biro bye. Gusa uyu musirikare we ubwo yagezwaga imbere y’ubutabera mu 2015 yahakanye ko atigeze atumaho Chebeya.

Uruhare mu rupfu rwa Chebeya na Bazana kandi ruvugwa no kuri Kalev Mutond wahoze ayoboye urwego rw’igihugu rw’ubutasi, ANR. Ubu Mutond ari gukurikiranwa n’ubutabera, mu nzi ishize urugo rwe rukaba rwaragoswe n’abapolisi ndetse rukanasakwa.

Mbere y’uko Mutond akurikiranwa, muri Gashyantare 2021 habanje gutabwa muri yombi Jacques Mugabo wari umupolisi, akaba yari amaze imyaka 11 ahigishwa uruhindu, akekwaho urupfu rwa Chebeya na Bazana.

Inkuru ku itabwa muri yombi rya Mugabo https://bwiza.com/?RDC-Jacques-Mugabo-yatawe-muri-yombi-nyuma-y-imyaka-11-ahigishwa-uruhindu

Gen Numbi yabaye umuyobozi wa Polisi y’Igihugu kuva muri Mutarama 2010 kugeza muri Nyakanga 2020. Ari ku rutonde rw’abafatiwe ibihano na Leta Zunze Ubumwe za Amerika bashinjwa ibyaha byo guhonyora uburenganzira bw’ikiremwamuntu.

Kurikira ibiganiro n’amavidewo binyura kuri Bwiza TV