General Cirimwami wambuwe imodoka na M23 na we arafunzwe

Urwego rushinzwe iperereza mu gisirikare cya Repubulika ya Demukarasi ya Congo (RDC) rumaze ibyumweru bibiri rufunze komanda w’ibikorwa byo kurwanya imitwe yitwaje intwaro mu ntara ya Ituri, Maj. Gen. Peter Cirimwami.

Amakuru aturuka muri RDC avuga ko Gen. Cirimwami akurikiranweho icyaha cy’ubugambanyi bukomeye, gusa nta gisobanuro kiratangwa ku mvano y’itabwa muri yombi rye.

Uyu musirikare yamenyekanye cyane ubwo yayoboraga ibikorwa byo kurwanya imitwe yitwaje intwaro mu ntara ya Kivu y’Amajyaruguru.

Tariki ya 21 Kamena 2022 ni bwo yagiye gukurikirana uko ingabo za Leta ziri guhangana n’umutwe witwaje intwaro wa M23 mu gace ka Kabindi kari muri teritwari ya Rutshuru, abarwanyi bawo bamwambura imodoka y’akazi ya Jeep, we ariruka.

Kwamburwa iyi modoka kwa Gen. Cirimwami kwakurikiye urupfu rw’uwari ukuriye abarinzi be, Maj. Eric Kiraku wishwe arashwe n’abarwanyi ba M23 mu ntangiriro za Kamena.

Gen. Maj. Cirimwami yatawe muri yombi mbere ya Lt Gen. Yav Philemon wamusimbuye muri Kivu y’Amajyaruguru muri Nyakanga. Yoherejwe muri gereza nkuru ya Makala kuri uyu wa 22 Nzeri 2022.