Polisi mu Karere ka Gisagara ifunze uwitwa Francois Nzeyimana, utuye Cyumba mu Murenge wa Muganza ashinjwa gukomeretsa umugabo mugenzi we. Uyu akaba yarafashwe mu ijoro ryo kuwa bere ku bufatanye bw’abaturage.
Bivugwa ko uyu Nzeyimana yateze mugenzi we, Mushokanyi Niyirora w’imyaka 38 akamukubita bikomeye akamukomeretsa. Uwafashwe akaba avuga ko yahohoteye mugenzi we kubera umugambi we wo kwiba aherutse kuburizamo.
Nk’uko umuvugizi wa polisi mu majyepfo, CIP Emmanuel Kayigi, yabitangaje, Nzeyimana ngo yagerageje kwiba ibintu mu gasantere ka Badakele, ariko umugambi we wicwa n’uko Mushokanyi yahise awumenyesha abashinzwe umutekano.
CIP Kayigi yibajije impamvu umuntu yategura kwihorera no ku mpamvu y’amafuti, akongeraho ko no kwihorera ari icyaha gihanwa n’amategeko nk’uko biteganywa n’ingingo ya 148.
Iyi ngingo ikaba ivuga ko umuntu wese ukomeretsa mugenzi we abigambiriye, umukubita cyangwa akamukorera ubundi bugizi bwa nabi ahanishwa igifungo kiri hagati y’amezi 6 n’imyaka 2 ndetse n’amande y’amafaranga 100,000 na 500,000frw.
Â
