Umugabo yishwe n’abaturage biha ubutabera mu Mujyi wa Goma, aho amakuru menshi avuga ko ibi byabereye mu gace ka Ndosho muri Komini ya Karisimbi, gahana imbibi na Teritwari ya Nyiragongo.
Abatangabuhamya benshi bavuga ko uwahohotewe yibasiwe n’agatsiko k’abantu bari barakaye bamushinja kunyereza igitsina cy’undi mugabo. Kubera ibihuha n’uburakari bw’abaturage, abaturage bamuteye amabuye kugeza apfuye.
Abayobozi b’inzego z’ibanze ariko, bahakanye ibyo birego ashinjwa bavuga ko nta shingiro bifite, bongeraho ko nta bimenyetso bifatika bishyigikira ibyo bihuha.
Umuyobozi w’Umujyi wa Goma, Désiré Kisuba Ngabo, washyizweho n’ihuriro rya AFC/M23, yamaganye iyi myitwarire y’abaturage mu itangazo rigenewe abanyamakuru kandi ashimangira ihame shingiro ry’uko nta muntu n’umwe wemerewe n’amategeko kwiha ubutabera.
Yamaganye kandi abakwiza ibihuha bishobora gushyira mu kaga ubuzima bw’inzirakarengane.
