Guverinoma ya Guinée yafashe icyemezo gikomeye cyo kubuza kohereza mu mahanga zahabu idatunganyije, mu rwego rwo guteza imbere inganda zitunganya amabuye y’agaciro imbere mu gihugu no kongera inyungu abaturage n’ubukungu bwacyo bikura muri uwo mutungo.
Perezida w’inzibacyuho, Jenerali Mamady Doumbouya, ni we watangaje iki cyemezo nyuma y’inama yahuje abakora ubucukuzi bwa zahabu ku rugero rw’inganda n’ababukora mu buryo bwa gakondo, ndetse n’abacuruzi ba zahabu.
Yavuze ko nubwo Guinée ifite ububiko bwa kabiri bunini bwa zahabu muri Afurika y’Iburengerazuba, imyaka myinshi zahabu yacukurwaga yoherezwaga hanze idatunganyijwe, bigatuma ibihugu by’amahanga ari byo biyungukiramo amafaranga menshi ava mu kuyitunganya no kuyicuruza
Yagize ati: “Kuva uyu munsi, ibyo birahagaritswe. Zahabu ya Guinée igomba gutunganyirizwa imbere mu gihugu mbere yo koherezwa ku masoko mpuzamahanga.”
Nk’uko ubuyobozi bwabitangaje, zahabu yose izajya ibanza gushongeshwa, igahabwa ibyangombwa biyemeza ubuziranenge bwayo, hanyuma igakorwamo utubuye twa zahabu mu ruganda rushya rwubatswe mu murwa mukuru, Conakry.
Perezida Doumbouya yanaburiye abakomeje kohereza zahabu idatunganyije ko bazamburwa impushya zo gucukura ndetse n’amasezerano y’ubucukuzi aseswe.
Imibare ya Minisiteri y’Ubucukuzi bw’Amabuye y’Agaciro n’Ibinyabuzima bya Guinée igaragaza ko mu mezi atatu ya mbere y’uyu mwaka, igihugu cyohereje mu mahanga ibiro birenga 22,000 bya zahabu, bicukurwa n’amasosiyete manini ndetse n’abacukuzi bato.
Iki cyemezo gikurikira icyo Zimbabwe na yo yafashe mu ntangiriro z’uyu mwaka cyo guhagarika kohereza mu mahanga lithium idatunganyije. Zimbabwe yavuze ko yashakaga gukumira uburiganya, kugabanya igihombo igihugu cyaterwaga no kohereza umutungo kamere udahawe agaciro, no guteza imbere inganda zitunganya amabuye y’agaciro imbere mu gihugu.
