Bwiza

Haiti: Umugore wa perezida uherutse kwicwa agiye guhatanira kuyobora igihugu

Amakuru•
Denis Nsengiyumva
By Denis Nsengiyumva
•Kuwa Mbere, 16 Ugushyingo 2026 saa 09:46
Haiti: Umugore wa perezida uherutse kwicwa agiye guhatanira kuyobora igihugu

Urubuga rwa komisiyo y'amatora rwagaragaje ku Cyumweru ko umugore w'uwahoze ari Perezida wa Haiti, Martine Moise, aziyamamariza umwanya wa perezida, mu matora ya mbere mu gihugu cyahuye n'ibibazo uruhuri mu myaka irenga icumi ishize.
‎
Martine Moise yakomerekeye mu iraswa ryahitanye umugabo we, wahoze ari perezida, Jovenel Moise, muri Nyakanga 2021 warashwe n'itsinda ry'abacanshuro.
‎
Uyu muperezida wishwe ntarasimburwa, kandi urupfu rwe rwarushijeho gushyira mu mvururu Haiti yari isanzwe mu bibazo bidashira by'umutekano biterwa n'udutsiko tw'abagizi ba nabi tugenzura igice kinini cy'umurwa mukuru.
‎
Icyiciro cya mbere cy'amatora ya perezida n'ay'abagize inteko ishingamategeko giteganijwe ku itariki ya 18 Nyakanga 2027.
‎
Urubuga rwa interineti rw'Akanama k'agateganyo gashinzwe Amatora rwerekanye ko Martine Moise ari umwe mu bakandida 33 baziyamamariza umwanya wo hejuru mu gihugu nyuma y'uko kwiyandikisha birangiye ku Cyumweru.

Denis Nsengiyumva

Inkuru yanditswe na: Denis Nsengiyumva

Umunyamakuru wa BWIZA.COM wanditse inkuru 11,310.