Umutwe witwaje intwaro wa Hezbollah ufite icyicaro muri Libani uravuga ko abarwanyi bawo barashe misile ku kigo cya gisirikare cya Tira al-Carmel giherereye mu majyepfo ya Haifa, muri Israel.
Igisirikare cya Israel cyavuze ko ibisasu bya roketi bitanu byaturutse muri Libani mu gace ka Haifa Bay, bimwe bikaba byasamiwe mu kirere. Yongeyeho ko igisasu kimwe cyaguye ahantu hakorerwa ubwubatsi, gikomeretsa umuntu byoroheje nk’uko iyi nkuru dukesha Al Jazeera ivuga.
Ku rundi ruhande, Igisirikare cya Israel kivuga ko ku bufatanye na Shin Bet, ishami ry’ubutasi bw’imbere mu gihugu, ingabo zirwanira mu kirere zateye zikica Alkaman Abed Elslam Khalil Anbar, kivuga ko yari ashinzwe brigade ya Palestinian Islamic Jihad (PIJ) iherereye mu mujyi wa Gaza.
Igisirikare cyavuze ko Anbar ari we wari inyuma y’iraswa rya za rokete za PIJ ziva mu karere ka Gaza zerekeza ku butaka bwa Israel kandi yari “umuntu ukomeye mu bikorwa byo gukora intwaro zimwe zikoreshwa n’uyu mutwe”.
