Kuva kuri uyu wa 25 Gicurasi 2021, i Bujumbura mu Burundi harabera inama ihuza ibihugu 11 byo mu Karere ka Afurika yo hagati yateguwe n’akanama k’Umuryango w’Abibumbye gashinzwe amahoro n’umutekano muri aka karere.
Iyi nama yiga ku mutekano, amatora n’umubano w’ibihugu byo muri aka karere, ni iya mbere mpuzamahanga iki gihugu cyakira kuva mu 2015 ubwo iki gihugu cyatangiye gututumbamo umwuka mubi wa politiki, wakurikiwe n’ibibazo by’umutekano muke byamazeyo igihe kirekire.
Umunyamabanga uhoraho muri Minisiteri y’Ububanyi n’Amahanga mu Burundi, Isidore Ntirampeba, mu nkuru ya Radiyo Ijwi rya Amerika, yavuze ko kuba iyi nama irabera muri iki gihugu, ari uko ubu amahoro n’umutekano byagarutse.
Ntirampeba kandi yavuze ko icyorezo cya Covid-19 cyugarije ibihugu byinshi ku Isi, u Burundi bwashoboye kukirwanya, ubu kidakaze nk’ahandi.
Yavue ko abateguye iyi nama, bashingiye kuri ibi, ngo bagize bati “Reka rero duhurire i Bujumbura! Basanga ibintu byose birakwiye, kuko mutahure ko bene wacu bavandimwe, inama nk’izi tutari tuziherutse kandi muzi icyabiteye, 2015 hari mu mwiryane mu mvururu, uyu munsi rero kubona iyi nama ikoraniye i Bujumbura, ni ukuvuga ko hakeye, harabona, hameze neza.”
Iyi nama izarangira tariki ya 28 Gicurasi 2021.
Kurikira ibiganiro n’amavidewo binyura kuri Bwiza TV
