Ubwato bunini bwa USS Gerald R. Ford buzwi nka CVN-78 bwitiriwe Gerald Ford wabaye Perezida wa 38 wa Leta Zunze Ubumwe za Amerika (USA), ni bwo bwa mbere ku Isi bufite ubushobozi bwo kwikorera indege z’intambara ziri hagati ya 75 na 90.
Izi ndege ubu bwato bwabasha kwikorera ziri mu bwoko butandukanye nka: F-35, F/A-18E/F Super Hornet, E-2 Hawkeye, EA-18G Growler, indege zitagira abapilote na kajugujugu za MH-60 Seahawk. Bushobora kandi no kurenzaho imodoka z’intambara.
Ubu bwato bwakozwe n’ikigo cya NNS (Newreport News Shipbuilding) gikora ubwubatsi bw’amato, burangira muri Nzeri 2009, bumurikwa mu Kwakira 2013, butangira gukoreshwa muri Nyakanga 2017. Icyo gihe bwasimbuye ubwabubanjirije bwa USS Enterprise bwamenyekanye nka CVN-65 bwari bumaze imyaka 51 buri mu kazi.
CVN-78 bufite uburebure bwa metero 333 kuri 78 n’ubuzamuke bwa metero 76 (333m x 78m x 76m), bukaba bufite igice cyo hasi kireshya na metero 41 kijya mu mazi. Ku buremere bwa toni 100,000 bugira mu gihe bwikoreye, bushobora kugendera ku muvuduko utarenze ibilmetero 56 ku isaha (56km/h).
Usibye kuba ubu bwato ari bwo bunini cyane mu bwikorera indege z’intambara, igisirikare cya USA kirwanira mu mazi (US Navy) kivuga ko bwahawe ubushobozi burimo ikoranabuhanga ryafasha ababukoresha kwitwara neza mu rugamba. Iryo ririmo iryifashishwa mu kuneka (radar) mu ntera ya kure cyane: AN/SPY-3 MFR (Multifunction Radar) na AN/SPY-4 VSR (Volume Search Radar), ryakozwe n’ikigo cya Raytheon cyo muri USA.
Ubwato bwa CVN-78 bushyigikirwaho imbunda ebyiri zirasa misile zo mu bwoko bwa RIM-162 ESSM n’izindi ebyiri RIM-116 RAM; zose zakorewe gusenya izindi misile zaburaswaho, hakiyongeraho imbunda ziringaniye eshatu za Phalanx CIWS n’enye za machine gun zizwi nka M2.50 Cal.
Ubu bwato bufite imbunda ebyiri zirasa misile za RIM-162 ESSM
Bufite izindi ebyiri zirasa misile za RIM-116 RAM
