Icyo RDC ivuga ku ndege yayo y’intambara yarashwe na RDF

Guverinoma ya Repubulika Iharanira Demokarasi ya Congo yashinje u Rwanda kugaba igitero ku ndege yayo y’intambara nkana, nyuma y’uko ivogereye ikirere cy’u Rwanda ikaraswa.

Kuri uyu wa Kabiri ni bwo indege yo mu bwoko bwa Sukhoi-25 y’Igisirikare cya Congo Kinshasa yavogereye ikirere cy’u mu karere ka Rubavu, ihita iraswa n’Ingabo z’u Rwanda.

Guverinoma y’u Rwanda mu itangazo yasohoye yemeje ko iriya ndege ikimara kuvogera ikirere cy’u ku nshuro ya gatatu hahise hafatwa ingamba z’ubwirinzi.

Iti: “Uyu munsi saa kumi n’imwe n’iminota itatu z’igicamunsi, Sukhoi-25 yo muri RDC yavogereye ikirere cy’u Rwanda ku nshuro ya gatatu. Hafashwe ingamba z’ubwirinzi. U Rwanda rurasaba RDC guhagarika ubu bushotoranyi.”

Amashusho yagiye hanze iriya ndege ikimara kuraswa ayerekana iri ku kibuga cy’indege cya Goma yaka umuriro, mbere yo kuzimywa n’abashinzwe kuzimya inkongi.

Amafoto yagiye hanze yo yerekana ko Sukhoi-25 ya FARDC yangijwe n’igisasu yarashweho.

Congo Kinshasa mu itangazo ryayo yashinje u Rwanda kurasa iriya ndege, mu gihe yari mu kirere cyayo yitegura kugwa ku kibuga cya Goma.

Iti: “Amasasu y’u Rwanda yarashwe ku ndege ya Congo yagurukaga mu gice cya Congo. Ntabwo yigeze igera mu kirere cy’u Rwanda. Indege yaguye itarangirika mu buryo bukomeye.”

Ku bwa Guverinoma ya Congo, ngo ibyakozwe n’u Rwanda ni “igikorwa cy’ubugizi bwa nabi nkana, kikaba ari igikorwa cy’intambara kigamije gusa guhungabanya ingufu zikomeje gushyirwa mu ishyirwa mu bikorwa ry’ibyemerejwe mu biganiro bya Luanda na Nairobi” bigamije gushakira umuti ibibazo bya Congo.

RDC kandi yavuze ko ifite “uburenganzira bwo kurinda ubutaka bwayo”, mbere yo gusaba amahanga gushyira igitutu ku Rwanda.

Sukhoi-25 ya FARDC ni ku nshuro ya gatatu yari ivogereye ikirere cy’u Rwanda.

Ni nyuma yo kubikora mu Ugushyingo mu mwaka ushize ubwo yinjiraga mu karere ka Rubavu ikagwa by’akanya gato ku kibuga cy’indege cya Rubavu, ndetse no mu Ukuboza umwaka ushize.

Izo nshuro zose u Rwanda rwamaganye buriya bushotoranyi.

Kuri iyi nshuro iriya Sukhoi-25 yavogereye ikirere cy’u Rwanda, mu gihe umwuka ukomeje kuba mubi hagati y’ibihugu byombi.

Ni umwuka mubi ushingiye ku kuba Repubulika Iharanira Demokarasi ya Congo imaze igihe ishinja u Rwanda guha ubufasha umutwe wa M23 umaze igihe mu mirwano n’Ingabo zayo.

M23 yari imaze igihe yaratangiye kuva mu bice bitandukanye by’intara ya Kivu y’Amajyaruguru yari yarigaruriye, gusa mu kuva gitondo cyo ku wa Kabiri imirwano ikomeye yongeye kubura hagati yayo n’Ingabo za FARDC, ndetse n’imitwe irimo FDLR bamaze igihe bakorana.

Ni imirwano inavugwamo abacuncuro bo ku mugabane w’u Burayi bakomeje gufatanya na FARDC kugaba ibitero ku birindiro bya M23.

Abategetsi ba Congo bamaze iguhe bikomanga ku gatuza bavuga ko isaha n’isaha intambara ishobora kwerura hagati y’igihugu cyabo n’u Rwanda bashinja gutera igihugu cyabo.

Minisitiri w’Ububanyi n’Amahanga wa Congo, Christophe Lutundula, aheruka gushimangira amagambo ya Perezida Félix Antoine Tshisekedi y’uko abanye-Congo bagomba kurangiza ikibazo cy’umutekano muke uri mu Burasirazuba bw’igihugu cyabo “ku kiguzi icyo aricyo cyose.”

Ni amagambo yamaganwe na Guverinoma y’u Rwanda, ivuga ko aca amarenga y’uko RDC yaba yitegura gushoza intambara ku Rwanda.

Mu mwaka ushize bwo Perezida Tshisekedi yatangaje ko intambara n’u Rwanda ishobora kuba amahitamo, mu gihe uburyo bwa dipolomasi bwaba ntacyo butanze.

Ni Tshisekedi uheruka kwanga kwitabira ibiganiro we na Perezida Paul Kagame bari batumiwemo i Doha muri Qatar mu rwego rwo gushakira umuti w’amakimbirane ari hagati y’u Rwanda na Congo.