U Burusiya bwoherereje Algérie indege ebyiri z’intambara zo mu bwoko bwa Sukhoi-57, iki gihugu cyo mu majyaruguru ya Afurika kiba icya mbere cyakiriye ziriya ndege zo mu kiragano cya gatanu.
U Burusiya bwemeje ko bwahaye Algérie ziriya ndege muri iki cyumweru, mu imurikagurisha ry’indege ryabereye i Dubai muri Leta Zunze Ubumwe z’Abarabu.
Umuyobozi w’u Burusiya uhagarariye uruganda rukora ziriya ndege, yatangaje ko zitamaze koherezwa gusa ko ahubwo “zamaze kwinjira mu kazi kandi zirerekana ubushobozi bwazo bwiza cyane.”
Sukhoi-57 Algérie yamaze gushyikirizwa ziri muri 14 yatumije mu Burusiya.
Amasezerano y’ubugure yasinywe muri 2021 avuga ko byibura uyu mwaka wa 2025 ugomba kurangira Algérie yakiriye indege esheshatu, izindi esheshatu ikazazakira mu mwaka utaha wa 2026 na ho ebyiri zisigaye ikazazihabwa muri 2027.
Televiziyo ya Leta ya Algérie iheruka gutangaza ko abapilote bo muri iki gihugu bamaze koherezwa mu Burusiya, aho bari kwiga gutwara ziriya ndege.
Sukhoi 57 ni indege y’intambara ihishwa ku buryo idapfa kubonwa (furtif), ndetse ifite ubushobozi bwo gukora imirimo myinshi irimo kurwanira mu kirere ndetse no kugaba ibitero ku butaka no mu mazi.
Iyi ndege, yamaze igihe kirekire yaragizwe ibanga, yabonwe neza mu mpande zitandukanye mu imurikagurisha rya Dubai Airshow riri kuba. Ni imurikagurisha ryahaye u Burusiya uburyo bwo kwerekana ku mugaragaro umwihariko w’iriya ndege yatangiye kugurisha ibihugu by’amahanga.
Ibi byatumye abantu batandukanye ndetse n’ibitangazamakuru byandika inkuru za gisirikare bakururwa na yo.
