Ikipe y’igihugu ya Caméroun ‘Les Lions Indomptables’, yatangiye nabi imikino y’Igikombe cy’Isi cya 2022 ikomeje kubera muri Qatar nyuma yo gutsindwa n’u Busuwisi igitego 1-0.
Caméeoun n’u Busuwisi bari bahuriye mu mukino wo mu itsinda G wabereye kuri Stade ya Al Janoub.
Ni umukino wasaga n’uringaniye ku mpande zombi, dore ko amakipe yombi yaremye uburyo bw’ibitego bujya kungana.
Igitego rukumbi cyo ku munota wa 48 w’umukino cya Breel Embolo ni cyo cyatandukanyije impande zombi. Ni ku mupira uyu rutahizamu wakinaga n’ikipe y’igihugu akomokamo yari ahawe na Xerdan Shaqiri.
Embolo nyuma yo gutsinda iki gitego yirinze kukishimira, mu rwego rwo kwirinda gushengura ubugira kabiri imitima y’abanya-Caméroun.
Iyi kipe iri muri atanu ahagarariye umugabane wa Afurika yatsinzwe umukino wa mbere, mu gihe Samuel Eto’o usanzwe ari Perezida w’Ishyirahamwe ry’umupira w’amaguru muri Caméroun yatangaje ko ikipe y’igihugu cye igomba kwegukana Igikombe cy’Isi cy’uyu mwaka.
Caméroun igomba gushakira intsinzi ya mbere kuri Serbia bagomba guhurira mu mukino wa kabiri w’itsinda ku wa Mbere w’icyumweru gitaha.
