Ikipe y’Igihugu ya Sénégal, Les Lions de la Téranga, yageze muri ? cy’irangiza mu gikombe cy’Isi gikomeje kubera muri Qatar; nyuma yo gutsinda Équateur bigoranye ibitego 2-1.
Hari mu mukino wa nyuma wo mu tsinda rya mbere amakipe yombi yari yahuriyemo kuri Stade Mpuzamahanga ya Khalifa.
Sénégal nyuma yo gutangira Igikombe cy’Isi itsindwa n’u Buholandi mbere yo gutsinda Qatar ibitego 3-1 mu mukino wa kabiri w’itsinda, yasabwaga gutsinda Équateur ku kabi n’akeza kugira ngo ibashe gusohoka mu matsinda.
Byasabye umunota wa 44 w’umukino ngo iyi kipe y’umutoza Aliou Cissé ifungure amazamu, ibifashijwemo na Ismaila Sarr.
Ni igitego uyu rutahizamu usanzwe akinira Watford yo mu cyiciro cya kabiri mu Bwongereza yatsinze kuri Penaliti, nyuma y’ikosa yari amaze gukorerwaho mu rubuga rw’amahina na myugariro Piero Hincapie.
Iki gitego cyaje gikurikira uburyo bwinshi bw’ibitego abanya-Sénégal bari bagiye barema, burimo amashoti abarirwa mu cyenda bari bateye hanze y’izamu.
Intangiriro z’igice cya kabiri cy’umukino zaranzwe n’igitutu cyinshi ku banya-Équateur bagarukanye umugambi wo kwishyura igitego bari batsinzwe.
Ni nyuma y’impinduka zasize abarimo Jeremy Sarmiento na José Cifuentes binjiye mu kibuga, bahabwa umwanya na Alan Franco cyo kimwe na Carlos Gruezo.
Byasabye umunota wa 68 w’umukino ngo Équateur yari yakunze kwisirisimba imbere y’izamu rya Sénégal yishyure igitego yari yatsinzwe biciye kuri Moisés Caicedo usanzwe akinira Brighton & Hove Albion yo mu Bwongereza.
Nta minota ibiri iciyemo Sénégal yahise itsinda igitego cya kabiri biciye kuri Kapiteni wayo Kalidou Koulibaly.
Iminota irenga 20 ya nyuma y’umukino yaranzwe no gusatira gukomeye kwa Équateru kutagize icyo kuyimarira.
Kuri ubu hari amahirwe menshi y’uko Sénégal muri ? cy’irangiza izahura n’u Bwongereza; dore ko ari bwo bufite amahirwe yo kuyobora itsinda rya kabiri.
Mu wundi mukino wo mu tsinda rya mbere: u Buholandi bwatsinze Qatar ibitego 2-0 busoza imikino y’itsinda buri imbere n’amanota arindwi, bukaba burusha inota rimwe Sénégal yabaye iya kabiri.
