Igihugu cya Israel kiravuga ko cyahanuye indege y’igisirikare cya Syria yari yinjiye mu kirere cyacyo mu majyepfo ya Golan nk’uko bitangazwa n’igisirikare cy’iki gihugu.
Igisirikare cya Israel kibinyujije kuri twitter kikaba cyatangaje ko missiles 2 zo mu bwoko bwa Patriot ari zozarashwe indege y’intambara ya Syria yo mu bwoko bwa Sukhoi kivuga ko yari yinjiye mu kirometero kimwe n’igice mu kirere cya Israel.
Amakuru ataremezwa neza nk’uko bitangazwa na BBC aravuga ko umupilote wari utwaye iyi ndege yahasize ubuzima.
Ibiro Ntaramakuru bya Syria, SANA, byo biratangaza ko Israel koko yarashe kuri imwe mu ndege za Syria zari zinjiye mu kirere cyayo ariko ntiyavuga niba hari iyafashwe n’igisasu.
Ibi biro ntaramakuru bikaba bivuga ko amakuru ava mu gisirikare yemeza ko iyo ndege yari iri mu bikorwa byo kurwanya udutsiko tw’iterabwoba hafi y’ikibaya cya Yarmouk.
Ikinyamakuru Haaretz cyo muri Israel nacyo kikaba kivuga ko abaturage batuye mu majyaruguru ya Israel babonye missiles zarashwe iyi ndege ziguruka nyuma bakumva uguturika guhambaye.
