Amakuru avuga ko imirwano ikaze yadutse mu bice byinshi by’akarere ka Tigray mu majyaruguru ya Ethiopia hagati y’inyeshyamba n’ingabo za leta. Umutwe w’inyeshyamba wo muri Tigray uzwi nka Tigray Defence Force (TDF) wavuze ko wafashe imijyi myinshi, aho ababibonye babwiye BBC ko babonye abarwanyi b’uyu mutwe bagenzura iyo mijyi. Umuvugizi w’inyeshyamba, Gebre GebreTsadiq yavuze ko ,TDF, yagabye igitero mu cyumweru gishize igambiriye imijyi myinshi. Yavuze ko abarwanyi b’uwo mutwe bashenye imodoka za gisirikare ndetse bafata abasirikare bamwe ba leta. Amakuru avuga ko inyeshyamba zinjiye mu mujyi wa Adigrat, uri ku ntera ya kilometero 45 uvuye ku mupaka wa Eritrea. Biramutse byemejwe, iyi yaba ari yo ntambwe ya mbere ikomeye itewe n’inyeshyamba kuva intambara yatangira. Abarwanyi ba TDF kandi bagaragaye mu mijyi myinshi haba mu majyaruguru no mu majyepfo y’umurwa mukuru Mekelle wa Tigray. Igisirikare cya Ethiopia cyamaganye ayo makuru, kivuga ko ari amakuru y’ibinyoma. Umuvugizi wacyo, Col Getnet yemeje ko habaye imirwano, ariko ahakana ko hari umujyi n’umwe, ibikoresho bya gisirikare cyangwa abasirikare bafashwe. Amakuru y’iyo mirwano aje mu gihe harimo kubarurwa ibyavuye mu matora rusange yo ku wa mbere. Nta matora yabaye muri Tigray kubera uko umutekano umeze muri ako karere. Iyi ni yo mirwano ya mbere ikaze itangajwe kuva mu kwezi kwa cumi na kumwe mu 2020, ubwo igisirikare cya Ethiopia cyatangazaga ko cyatsinze imirwano. Abantu babarirwa mu bihumbi barishwe naho abandi babarirwa muri za miliyoni bata ingo zabo kubera intambara imaze amezi hafi umunani itangiye. Kurikira ibiganiro n’amavidewo binyura kuri Bwiza TV
