Imitwe irwanya ubutegetsi bw’u Rwanda yarashegeshwe- Raporo nshya ya Loni

Sangiza iyi nkuru

Akanama k’umutekano k’Umuryango w’Abibumbye tariki ya 2 Kamena 2020 kashyize ahagaragara raporo igaragaza imibereho y’imitwe yitwaje intwaro iri muri Repubulika Iharanira Demukarasi ya Congo, ikaba yerekana ko imwe mu mitwe irwanya ubutegetsi bw’u Rwanda yashegeshwe na Operasiyo za FARDC.

Iyi raporo ishingiye ku bushakashatsi bwakoze n’itsinda ry’impuguke zo muri RDC hifashishijwe ibiganiro zagiranye n’abahoze ari abarwanyi b’iyi mitwe,
abayobozi muri FARDC, abaturage ndetse na za sosiyete sivile. Imitwe nka CNRD-Ubumwe na RNC igaragaramo cyane.

CNRD (Conseil National pour le Renouveau et la Démocratie)

Iyi raporo isobanura ko operasiyo ingabo za FARDC zakoze kuva tariki ya 26 Ugushyingo 2019 yashegeshe uyu mutwe, aho abayobozi bawo batakaje ububasha bwo gukomeza kuwuyobora, ituma abarwanyi ndetse n’imiryango yabo batatanira muri teritwazi za Kalehe, Mwenga, Walungu na Uvira mu Ntara ya Kivu y’Amajyepfo.

Icyo gihe, FARDC zakomeje guhiga abarwanyi ba CNRD, zibavana muri Kalehe nk’uko abayobozi mu gisirikare cy’igihugu ndetse na batandatu bahoze barwanira uyu mutwe babitangarije izi mpuguke. Umwe muri aba barwanyi bamanitse amaboko, yatangaje ko abarwanyi bagenzi be batabashije kongera kubona abayobozi babo.

Abaturage babwiye izi mpuguke ko FARDC zakomeje kotsa igitutu abarwanyi ba CNRD, zibasanga muri Walungu no mu ishyamba rya Mwenga, abenshi barahakomerekera, ibihumbi byabo byafashwe mpiri bajyanwa mu birindiro bya FARDC muri Nyamunyunyi iri muri Bukavu. Ababashije gucika, bahungiye mu ishyamba rya Itombwe mu misozi ya Uvira, nk’uko byatangajwe n’abahoze muri CNRD ndetse n’abasirikare bakuru ba FARDC babiri.

Abahoze barwanira CNRD batangaje ko muri iyo operasiyo, abarwanyi babo benshi bishwe, abandi bicwa n’ibikomere ndetse n’indwara. Umusirikare mukuru muri FARDC we yemeje ko bishe abarwanyi b’uyu mutwe bagera kuri 200, abandi bagera kuri 70 baguma muri Teritwari ya Kalehe.

Muri icyo gihe, abahoze barwanira CNRD batangarije izi mpuguke ko batazi niba abayobozi babo barimo Ndagijimana cyangwa Lumbago uzwi ku izina rya Wilson Irategeka ndetse na Antoine Hakizimana uzwi nka ‘Jeva’ bakiriho, cyangwa se barapfuye.

Ibiro bikuru bya FARDC byatangaje ko abarwanyi 360 ndetse n’imiryango yabo igizwe n’abantu 2691, bafashwe mpiri muri teritwari za Walungu na Mwenga, abenshi muri bo boherezwa mu Rwanda mu Kuboza 2019.

Bamwe mu bahoze ari abarwanyi ba CNRD bagiye boherezwa mu Rwanda

P5

Iri tsinda ry’impuguke ryasanze umutwe wa P5 na wo warashegeshwe na ‘Operasiyo Sokola II’, bituma abarwanyi bawo mu gace ka Bijabo muri Teritwari ya Uvira muri Mata 2019, bagahungira mu Ntara ya Kivu y’Amajyaruguru. Abaganirijwe ni abarwanyi batanu bahoze muri P5, batanu bari abayobozi muri P5, abayobozi babiri muri FARDC ndetse na sosiyete sivile eshatu.

Batatu bahoze barwanira P5, umwe mu bayobozi bawo ndetse n’umuyobozi muri FARDC batangaje ko muri Mata 2019, abarwanyi b’uyu mutwe bategetswe kuva muri Bijabo, bakimukira i Masisi banyuze muri Kalehe. Icyo gihe bageze muri Kalehe bakirwa n’abarwanyi ba CNRD-Ubumwe. Byageze muri Kamena 2019, ingabo za FARDC zibagabaho ibitero muri Masisi, ahitwa Kashovu, icyo gihe abenshi muri P5 barishwe, abandi bafatwa mpiri.

Icyo gihe abahunze berekeje muri Binza/ Teritwari ya Rutshuru, bahasanga abarwanyi ba RUD-Urunana ndetse na FDLR. Byemezwa na babiri bahoze barwanira P5 ndetse na babiri bahagarariye sosiyete sivile.

Iri tsinda mu bushakashatsi ryari rikomeje, ryabashije kuvugana na Kayumba Nyamwasa washyizwe mu majwi ko ari umuyobozi wa P5. Gusa we yatangaje ko ari muri RNC ariko ahakana kuba umuyobozi w’uyu mutwe.