Minisiteri y’Ubuzima yatangaje ko kuri uyu wa 10 Werurwe 2021 cyatangiye igikorwa cyo gukingira icyorezo cya Covid-19 mu nkambi z’impunzi, ikaba yahereye mu y’agateganyo ya Gashora icumbikiye impunzi zaturutse muri Libya ndetse n’abakozi bayikoreramo.
Ni ku munsi wa 6 w’ikingira ku rwego rw’igihugu, aho abamaze gukingirwa muri rusange barenga 220,000 kuva iki gikorwa cyatangira tariki ya 5 Werurwe 2021.
Iyi Minisiteri ivuga ko nyuma yo gukingira abari muri iyi nkambi iherereye mu Karere ka Bugesera isanzwe icumbikiye impunzi 197 n’abakozi 154, irakomereza iki gikorwa no mu zindi nkambi, hibandwa ku byiciro byugarijwe kurusha ibindi n’abari muri gahunda yo kwimurirwa mu bindi bihugu.
Mu nkambi y’agataganyo ya Gashora
Hakingiwe impunzi n’abakozi bo mu nkambi
Tariki ya 3 Werurwe 2021 ni bwo inkingo za mbere 342,000 zirimo 240,000 za Astra Zeneca n’102,000 za Pfizer BioNTech zageze mu Rwanda, binyuze muri gahunda ya Covax igamije kuzigeza mu bihugu biri mu nzira y’iterambere.
Mu gihe inkingo u Rwanda rukeneye zaboneka, rufite gahunda yo gukingira Abaturarwanda 30% muri uyu mwaka na 60% kugeza mu mpera z’umwaka w’2022.
Amafoto: Rwanda Health/Twitter
Kurikira ibiganiro n’amavidewo binyura kuri Bwiza TV
