Minisiteri ishinzwe kurwanya ibiza n’ubutabazi bwihutirwa yatangaje mu itangazo ryayo ko indege itwara abagenzi yavaga muri Azerbaijan yerekeza mu Burusiya yakoze impanuka hafi y’Umujyi wa Aktau muri Kazakhstan ubwo yageragezaga kururuka mu buryo bwihutirwa.
Indege ifite numero J2-8243, ya Embraer 190 ifite abagenzi 62 ​​hamwe n’abakozi batanu bayo, byabaye ngombwa ko igwa byihutirwa nko mu bilometero 3 uvuye Aktau.
Abashinzwe ubuzima bavuga ko abantu 28, barimo abana batatu, barokotse iyo mpanuka maze bajyanwa mu bitaro, mu gihe imirambo ine yabonetse.
Minisiteri ishinzwe ubutabazi yavuze ko serivisi zishinzwe kuzimya inkongi bazimije umuriro nk’uko iyi nkuru dukesha Al Jazeera ikomeza ivuga.
Yulia Shapovalova wo muri Al Jazeera i Moscow yagize ati: “Nkurikije raporo z’ibanze, indege yasabye ko yagwa ku kibuga cy’indege mbere y’impanuka… kubera igihu kinini muri Grozny.”
Shapovalova yongeyeho ko abagenzi bari muri iyo ndege barimo abaturage ba Azerbaijan, u Burusiya, Kazakhstan na Kyrgyzstan.
Ikigo gishinzwe gukurikirana iby’indege mu Burusiya cyatangaje ko amakuru y’ibanze yerekana ko umuderevu yafashe icyemezo cyo kugwa byihutirwa nyuma yo kugonga inyoni.
Ibiro Ntaramakuru by’u Burusiya byatangaje ko Perezida wa Azerbaijan, Ilham Aliyev, atarangije uruzinduko rwe mu Burusiya aho yagombaga kwitabira inama kuri uyu wa Gatatu.
Ibiro Ntaramakuru Interfax byatangaje kandi ko abayobozi muri Kazakhstan bavuze ko batangiye kureba mu buryo butandukanye icyateye iyi mpanuka, harimo n’ikibazo cya tekiniki.
