Nyuma y’uko Ingabo za Kenya zigeze muri RDC mu bikorwa byo guhashya imitwe yitwaje intwaro yayogoje Uburasirazuba bw’iki gihugu (Brigade d’intervention des Nations unies), ingabo z’ibihugu bya Nepal na Afurika y’Epfo na zo zitegerejwe muri kiriya gihugu mu gihe cya vuba.
Ni amakuru yemejwe n’Ubutumwa bwa Loni bwo kugarura amahoro muri Repubulika Iharanira Demokarasi ya Congo (MONUSCO).
Ingabo zo muri Nepal na Afurika y’Epfo zitegerejwe mu Burasirazuba bwa RDC, nyuma y’iz’ibihugu bya Kenya na Tanzania zahageze mu minsi ishize.
Ku wa 09 Kanama ni bwo ingabo za Kenya zageze muri Béni ho mu ntara y’Amajyaruguru ziturutse i Nairobi.
Izi ngabo ni iz’Umuryango w’Abibumbye (United Nations Force Intervention Brigade (FIB) ni zimwe mu zigize MONUSCO, zigiye kuza gufasha ingabo za FARDC mu rugamba rwo gutsintsura imitwe y’iterabwoba n’indi ikorera mu Burasirazuba bwa Congo.
Ni ingabo zemejwe n’Akanama ka Loni gashinzwe Amahoro muri Werurwe 2013, icyo gihe icyari kigamijwe ni ukwambura intwaro Umutwe wa M23 n’indi mitwe ikomoka mu bihugu by’amahanga.
Mu nshingano izi ngabo zizaba zifite harimo harimo gufatanya n’inzego zishinzwe umutekano n’iza gisivile gucungira.umutekano urambye w’abasivili, no kubafasha kugenda bisanzuye.
Nko mu duce twa Beni na Ituri, ingabo ziri mu butumwa bwo kugarura amahoro na FARDC zikora ubutumwa bwo guherekeza imodoka z’abasivili n’amakamyo atwara ibicuruzwa, mu rwego rwo kwirinda ibitero byibasira abaturage b’inzirakarengane ku mihanda.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
