Guverinoma ya Cameroon n’iy’u Burusiya ziherutse kugirana amasezerano y’ubufatanye mu by’igisirikare.
Nk’uko radiyo mpuzamahanga y’Abafaransa, RFI yabitangaje, aya masezerano yasinyiwe i Moscow ku ruhande rwa Cameroon yari ahagarariwe na Minisitiri w’ingabo, Joseph Beti Assomo na mugenzi we w’u Burusiya, General Sergei Choïgou.
Mu by’ingenzi bikubiye muri aya masezerano ari ku mpapuro 13 harimo guhanahana amakuru mu rwego rw’umutekano by’umwihariko mu gisirikare, guhana imyitozo, uburezi mu by’igisirikare, ubuvuzi no gusangira ubunararibonye mu kubungabunga amahoro n’umutekano, hashingiwe ku masezerano y’Umuryango w’Abibumbye.
Aya masezerano ashyizweho umukono mu gihe amajyaruguru ya Cameroon yugarijwe n’ibikorwa by’iterabwoba by’umutwe wa Boko Haram. Ni mu gihe kandi u Burusiya bukomeje kugaba ibitero muri Ukraine, byatumye bwamaganwa n’ibihugu byinshi byiganjemo ibikomeye ku Isi.
