Ingabo za Repubulika ya Centrafrica, iz’u Rwanda n’iz’u Burusiya kuri uyu wa 25 Mutarama 2021 zivuganye abarwanyi 44 b’imitwe yitwaje intwaro irwanya ubutegetsi bwa Centrafrica.
Nk’uko igisirikare cya Centrafrica (FACA) kibyemeza, aba barwanyi biciwe mu gace Boyali kari mu bilometero 90 ugana mu murwa mukuru, Bangui.
FACA yemeza ko aba barwanyi barimo abaturutse muri Chad, Sudan no mu bwoko bw’Abafulani, bari bafite umugambi wo kugota Bangui, hanyuma bagahirika ubutegetsi bwa Perezida Faustin Touadéra uherutse gutsinda amatora y’Umukuru w’Igihugu bwa kabiri.
Umuvugizi wa Guverinoma ya Centrafrica, Ange-Maxime Kazagui yatangarije Ibiro Ntaramakuru by’Abafaransa (AFP) dukesha aya makuru, ko usibye aba barwanyi bishwe, aba basirikare babohoye agace ka Boda kari karanyazwe n’imitwe y’inyeshyamba, kari mu bilometero 124 ugana Bangui.
