Abasirikare 688 ba FARDC mu mpera z’icyumweru gishize basoje imyitozo ya gisirikare yo kurwanira mu mashyamba yatanzwe mu rwego rw’ubufatanye bwa gisirikare hagati ya RDC n’Umuryango w’Abubumbye.
Aba basirikare batojwe mu gihe cy’ibyumweru bibiri ahitwa Rwampara, agace gaherereye hafi y’Umujyi wa Bunia. Usibye amasomo yo kurwanira mu mashyamba, banahuguwe ku bijyanye n’uburenganzira bwa muntu.
Komanda w’ingabo za Monusco ku rwego rw’igihugu, yasobanuye ko yizeye ko abahawe iyi myitozo bagiye kurushaho kugaragaza imbaraga mu bitero ku mitwe y’inyeshyamba ikomeje guhungabanya umutekano mu bice bitandukanye by’Intara ya Ituri.
Iyi myitozo yasojwe guha abayitabiriye (Brevets)ibyemeza ko bayikurikiranye imbere y’abayobozi ba gisivili n’aba gisirikare nk’uko iyi nkuru dukesha politikico.cd ikomeza ivuga.
Intara ya Ituri imaze imyaka igera muri 5 yugarijwe n’ibikorwa bihungabanya umutekano bya hato na hato birangwa n’ibyaha byibasira inyokomuntu n’ubwicanyi bukorerwa abasivili.
Igisirikare cya FARDC kiri guhabwa imyitozo yo kurwanira mu ishyamba mu gihe kimaze imyaka isaga 20 gihangana n’imitwe yitwaje intwaro itandukanye yiganje mu mashyamba yo mu burasirazuba bw’igihugu, kikaba cyakagombye kuba gifite ubunararibonye mu kurwanira mu ishyamba kurusha izindi ngabo zose zo muri Afurika.
Kurikira ibiganiro n’amavidewo binyura kuri Bwiza TV
