Minisiteri y’Ubuzima (MINISANTE) kuri uyu wa 4 Werurwe 2021 yatangaje ko inkingo z’icyorezo cya Covid-19 zagejejwe mu Rwanda ejo hashize, zirarara zigejejwe mu gihugu hose.
Nk’uko iyi Minisiteri yabitangarije ku rubuga rwa Twitter, izi nkingo ziragezwa mu bitaro ndetse n’ibigo nderabuzima bya Leta, ari naho igikorwa cyo gukingira kizabera.
Yagize iti: “Inkingo za Covid-19 zaraye zakiriwe, uyu munsi zirarara zigejejwe mu bitaro n’ibigo nderabuzima bya Leta mu gihugu hose. Ni ho igikorwa cyo gukingira kizabera.”
Mu gitondo cyo kuri uyu wa 3 Werurwe 2021 ni bwo icyiciro cya mbere cy’inkingo za Astra Zeneca ibihumbi 240 zatanzwe muri gahunda ya Covax igamije kugeza inkingo mu bihugu biri mu nzira y’iterambere, zageze mu Rwanda.
Ku mugoroba na none muri gahunda ya Covax, haje ikindi cyiciro cy’inkingo za Pfizer BioNTech ibihumbi 102.
Amashusho ya MINISANTE yerekana ko imodoka zibishinzwe ziherekejwe na Polisi y’Igihugu zatangiye kujya gufata izi nkingo i Kigali, zizijyana mu bitaro n’ibigo nderabuzima mu gihugu, bikaba biteganyijwe ko igikorwa cyo gukingira kiratangira kuri uyu wa 5 Werurwe 2021.
Kurikira ibiganiro n’amavidewo binyura kuri Bwiza TV
