Amakuru aturuka mu burasirazuba bwa Repubulika Iharanira Demokarasi ya Congo avuga ko Maj. Bizubishaka, umwe mu bayobozi bakomeye mu rwego rw’ubutasi rwa FDLR akaba n’umwe mu bantu ba hafi ba Gen. Ntawunguka Pacifique ‘Omega’ ukuriye igisirikare cy’uriya mutwe, yashimuswe mu cyumweru gishize.
Amakuru agera kuri BWIZA yemeza ko Bizubishaka yafatiwe mu gace ka Rugari, muri Teritwari ya Rutshuru ho mu ntara ya Kivu y’Amajyaruguru.
Abahaye amakuru iki gitangazamakuru bakibwiye ko uyu mugabo yafatiwe iwe mu rugo, ajyanwa uwumwe. Nta makuru arambuye aratangazwa ku buryo yashimuswemo cyangwa aho yaba yarajyanywe, ariko bikekwa ko yaba yarafashwe n’umutwe wa AFC/M23 ugenzura ibice byinshi bya Kivu y’Amajyaruguru.
Major Bizubishaka yari asanzwe yungirije mu kuyobora ubutasi bwa FDLR Général de Brigade Uwimbabazi Sébastien alias Kimenyi Gilbert Nyembo, gusa yari umwe mu bantu bagiraga uruhare rukomeye mu bikorwa by’ubutasi by’uyu mutwe.
Amakuru amugaragaza nk’umwe mu bakozi bakoraga byinshi muri uru rwego kandi wari uzwiho gutinywa n’abo bakoranaga.
Abazi ibibera muri FDLR bavuga ko yari umwe mu nkingi za mwamba z’uyu mutwe, cyane cyane mu bikorwa byo gukusanya no gutunganya amakuru y’ubutasi. Bivugwa kandi ko yari somambike wa Gen. Omega.
Bizubishaka avuka ahitwa mu Gasiza, mu yahoze ari Komine Karago muri Perefegitura ya Gisenyi. Kuri ubu ni mu murenge wa Rambura ho mu karere ka Nyabihu. Yahoze mu ngabo za Ex-FAR mbere yo guhungira mu mashyamba ya Congo Kinshasa, icyo gihe akaba yari afite ipeti rya Caporal.
