Minisitiri wa Siporo, Aurore Mimosa Munyangaju, yanejejwe n’intsinzi ya APR FC, nyuma yo gutsinda irusha Young Africans ibitego 3-1.
Mu ijoro ryacyeye ni bwo APR FC yatsinze iriya kipe ikunzwe kurusha izindi muri Tanzania, igera muri ½ cy’irangiza cy’irushanwa rya Mapinduzi Cup rikomeje kubera mu birwa bya Zanzibar.
Young Africans yihariye igice cya mbere cy’umukino hafi ya cyose yafunguye amazamu ku munota wa 23 w’umukino ibifashijwemo na Jesus Moloko wari uhawe umupira mwiza na Clement Mzize.
Mbere gato y’uko igice cya mbere cy’umukino kirangira APR FC yaje kwishyura iki gitego biciye kuri Sanda Soulei uri mu bakinnyi bamaze igihe bayikoreramo igerageza.
Hari ku mupira Soulei yambuye myugariro wa Yanga awucomekera Mbaoma wateye ishoti rigakurwamo n’umunyezamu Abuutwalib Mshrey, umugarukiye ahita awushyira mu izamu.
Iminota 45 y’umukino yarangiye amakipe yombi anganya igitego 1-1.
Igice cya kabiri cy’umukino hafi ya cyose cyihariwe n’abasore b’umutoza Thierry Froger bashyize Yanga ku gitutu gikomeye.
Byasabye umunota wa 49 ngo Nyamukandagira iyobore umukino, nyuma yo gutsindirwa kuri penaliti igitego cya kabiri n’umunya-Nigeria Victor Mbaoma.
Ni igitego uyu rutahizamu waje kuvunika yatsinze nyuma y’ikosa myugariro Ndayishimiye Dieudonné yari amaze gukorerwaho n’umunyezamu wa Yanga mu rubuga rw’amahina.
Sharaf Eldin Shiboub yatsindiye APR FC agashinguracumu ku munota wa 79 w’umukino, nyuma y’umupira yari ahawe n’agatsitsino na Mbonyumwami Thaiba winjiye mu kibuga asimbura Mbaoma.
Minisitiri Aurore Mimosa Munyangaju abinyujije ku rubuga rwe rwa X, ari muri benshi bishimiye iriya ntsinzi y’amateka APR FC yakuye kuri Yanga.
Ati: “APR FC Oyeeeee! Nimwishyuke ku bw’iyi ntsinzi y’amateka.”
APR FC izahurira muri ½ cy’irangiza na Mlandege FC yo muri Zanzibar yasezereye KVZ kuri penaliti 3-2 nyuma y’uko iminota 90 y’umukino yarangiye amakipe yombi anganya 0-0.
