Mu rwego rwa gahunda y'ubufatanye n’abaturage, Inzego z’Umutekano z’u Rwanda (RSF-5), zikorera mu Karere ka Mocímboa da Praia muri Mozambike, uyu munsi, zahaye ubuyobozi bw’umujyi ibikoresho by’ingenzi bizifashishwa n’Ikigo Nderabuzima cya Mocímboa da Praia mu gutanga serivisi z'ubuvuzi ku baturage.
Ibikoresho byatanzwe birimo ameza, intebe, ibyifashishwa mu kubika imiti, ibitanda na matola. Ibi bikoresho bizafasha kunoza serivisi z’ubuvuzi zihabwa abaturage bo mu Mudugudu wa Philippe Nyusi n’abo mu bice biwukikije bya Josina Machel na Buji.
Umuhango wo gushyikiriza ibi bikoresho ubuyobozi witabiriwe n’abayobozi b'inzego z'ibanze n'abaturage, Umuyobozi w’Ingabo (Task Force Brigade Group 7), Umuyobozi w’Ishami rya Polisi n’abandi basirikare n’abapolisi bakuru ba RSF.
Umuyobozi w'Umujyi wa Mocímboa da Praia, Madamu Helena Bandeira, yashimiye RSF-5 ku nkunga ikomeje gutanga mu kubungabunga amahoro n’umutekano muri ako gace.
Dr Patrice Lourenço Patrício, wari uhagarariye Ibitaro bya Mocímboa da Praia, yashimiye Inzego z'Umutekano z’u Rwanda ku ruhare zigira mu kugarura amahoro n’umutekano mu Ntara ya Cabo Delgado.
Mu butumwa yatanze mu izina ry’Umuyobozi wa RSF-5, CP Bertin Mutezintare, uyobora Ishami rya Polisi, yavuze ko Inzego z'Umutekano z'u Rwanda zizakomeza gushimangira ubufatanye n’abaturage no kubashyigikira mu bikorwa bigamije kubungabunga amahoro, umutekano n’ituze.
Binyuze muri gahunda nk’izi, RSF-5 ikomeje kwegera abaturage no kubaka icyizere n’ubufatanye hagati y’inzego z’umutekano n’abaturage.