Umutwe wiyita leta ya kisilamu (IS) wigambye kugaba igitero cy’ibisasu bibiri byaturikiye mu murwa mukuru Kampala wa Uganda ku wa kabiri, uvuga ko byagabwe n’abiyahuzi biturikirizaho ibisasu bawo. IS yatangaje iby’icyo gitero ku rubuga rwa Telegram, mu izina ry’icyitwa intara yo muri Afurika yo hagati (ISCAP). IS ivuga ko iki gitero cyakozwe n’Abanya-Uganda, uwa mbere akaba yaturikije igikapu kirimo ibiturika hafi ya bariyeri ya polisi, naho undi agituritsa agambiriye abarinzi bo ku nyubako y’inteko ishingamategeko. Nk’uburyo bwo gusobanura impamvu y’icyo gitero, ibiro ntaramakuru Amaq bya IS byavuze ko Uganda ari “kimwe mu bihugu biri mu ntambara yo kurwanya abarwanyi ba Islamic State [IS] muri Afurika yo hagati”. Abayobozi bo muri Uganda bari bavuze ko icyo gitero cyakozwe n’umutwe wa Allied Democratic Forces (ADF), umutwe w’inyeshyamba mu 2019 watangaje ko uyobotse IS. IS yigambye ibyo bitero byombi, polisi ivuga ko byari bifitanye isano ya hafi n’umutwe wa ADF – harimo n’uko uwo witurikirijeho igisasu yari ari ku rutonde rw’abo polisi ishakisha bo muri ADF. Mu bitero byabaye, Polisi ya Uganda ivuga ko Abanya-Uganda batatu bapfuye, abiyahuzi batatu bagabye igitero barapfa, naho abandi bantu 33 barakomereka, barimo batanu bakomeretse bikomeye. Abapolisi babiri bari muri abo bapfuye
