Israel yashinje Iran kuba ari iyo iri inyuma y’igitero ku bwato bw’ibitoro bwiciwemo abantu babiri mu bari babutwaye – Umwongereza n’Umunya-Romania (Roumanie). Ubwato MV Mercer Street, bukoreshwa na kompanyi ifite icyicaro i London ya Zodiac Maritime, bwari buri ku nkengero ya Oman mu nyanja ya Arabian Sea ubwo icyo gitero cyabaga ku wa kane. Iyo kompanyi, y’umuherwe mu bwikorezi bwo mu bwato wo muri Israel Eyal Ofer, yavuze ko irimo kugerageza kumenya neza ibyabaye. Ariko ku wa gatanu Minisitiri w’ububanyi n’amahanga wa Israel Yair Lapid yegetse icyo gitero ku “iterabwoba rya Iran”. Mu itangazo yasohoye, Lapid yagize ati: “Iran si ikibazo cya Israel gusa”, yongeraho ati: “Isi ntabwo igomba guceceka”. Ibyabaye kuri ubwo bwato bufite ibendera rya Liberia, bw’Ubuyapani, ntabwo birasobanuka. Iran nta cyo iravuga kuri ibyo birego.
