Umuryango wa Issa Hayatou wahoze ari Perezida w’Impuzamashyirahamwe y’Umupira w’Amaguru muri Afurika (CAF), wanyomoje amakuru yavugaga ko yapfuye.
Uyu munya-Cameroun w’imyaka 77 y’amavuko, yayoboye CAF imyaka 29 kugeza muri 2017, ubwo yasimburwaga n’umunya-Madagascar, Ahmad Ahmad.
Yanayoboye kandi by’agateganyo Impuzamashyirahamwe y’Umupira w’Amaguru ku Isi (FIFA), nyuma y’uko muri 2015 Sepp Blatter wari umaze igihe ayiyoboye yari amaze guhagarikwa mu bikorwa by’umupira w’amaguru kubera ibyaha bya ruswa yari akurikiranweho.
Kuva ku wa Gatanu tariki ya 1 Mutarama ni bwo hakwirakwiye amakuru y’uko uyu mukambwe yaba yapfuye. Ni amakuru yakwirakwijwe bwa mbere n’ibitangazamakuru byo muri Cameroun, mbere y’uko aza kunyomozwa n’umuryango we.
Umunyamakuru Njie Enow yifashishije urubuga rwe rwa X, yatangaje ko yavuganye n’umuhungu Hayatou amaze igihe arera amubwira ko uyu mukambwe ari muzima.
Ati: “Kugeza kuri uyu wa Gatanu tariki ya 1 Werurwe 2024, saa 8:30 GMT, amakuru avuga ko Issa Hayatou wahoze ari Perezida wa CAF n’uwa FIFA yapfuye ni ibinyoma. Mu minota mike ishize navuganye n’umwe mu bahungu Hayatou arera na we watunguwe n’ayo makuru, ananyemerera ko Hayatou atigeze apfa”.
Umuryango wa Hayatou kandi wemeje ko ameze neza i Paris mu Bufaransa aho amaze igihe atuye.
