Abarwanyi barimo 7 b’umutwe w’iterabwoba wa ADF bakoreraga mu Ntara ya Ituri muri Repubulika ya Demukarasi ya Congo (RDC) baherutse kurambika intwaro.
Radio Okapi dukesha iyi nkuru ivuga ko aba barwanyi (ntabwo amazina yabo yatangajwe) barimo batanu b’Abanyekongo na babiri b’Abanyarwanda; bose bakaba bararambitse intwaro hagati ya tariki ya 15 na 17 Nyakanga 2021.
Barimo abarambikiye intwaro mu gace ka Tchabi tariki ya 15 n’iya 16 Nyakanga n’abarambikiye intwaro muri Boga tariki ya 17 Nyakanga.
Nyuma yo kurambika intwaro bakishyikiriza ingabo za Leta, aba barwanyi bamurikiwe abayobozi bakuru b’igisirikare muri Ituri tariki ya 18 Nyakanga 2021.
Impamvu nyamukuru yatumye barambika intwaro nk’uko babivuze, ni uko kuva iyi ntara yashyirwa mu bihe bidasanzwe mu ntangiriro za Gicurasi 2021 bakomeje kugabwaho ibitero n’ingabo za Leta, bigamije kurandura burundu umutwe wa ADF n’indi ihungabanya umutekano mu burasirazuba bwa RDC.
