Minisitiri w’Ububanyi n’Amahanga wa Repubulika Iharanira Demokarasi ya Congo, yahinduye imvugo nyuma yo gutangariza muri Loni ko mu 1994 habaye Jenoside yakorewe Abahutu b’i Burundi.
Ku wa 16 Mata ni bwo Umukuru wa dipolomasi ya RDC yabwiye akanama gashinzwe amahoro n’umutekano muri Loni ko mu Burundi habaye iriya Jenoside.
Uyu yavuze ko usibye Jenoside yakorewe Abatutsi yabaye mu Rwanda mu 1994, muri uwo mwaka hari n’indi yakorewe Abahutu bo mu Burundi.
Ati: “Tuributsa andi makuba yabaye mu karere k’ibiyaga bigari kabaye mu icuraburindi igihe kirekire. Ni Jenoside yakorewe Abahutu b’i Burundi mu 1994. Yakozwe bucece, itwara ubuzima bw’ibihumbi by’abasivile.”
Nyuma y’aya magambo Minisitiri Kayikwamba yokejwe igitutu cyinshi, asabwa kuvuguruza ariya magambo.
Umujyanama Mukuru ku bufatanye mpuzamahanga, amahoro n’umutekano mu Muryango wa Afurika Yunze Ubumwe, Amb. Kateretse Fréderick Ngoga, ari mu bamusabye kuvuguruza kuko mu Burundi nta Jenoside iyo ari yo yose yigeze ihaba mu myaka 31 ishize.
Minisiteri y’Ububanyi n’Amahanga ya RDC mu itangazo yasohoye ku Cyumweru tariki ya 20 Mata, yagaragaje ko Minisitiri Kayikwamba yibeshye.
Iyi Minisiteri yavuze ko ubwicanyi uriya mugore yavugaga ari ubwabereye mu Burundi mu 1972 aho kuba mu 1994.
Yunzemo iti: “Ibintu bibabaje byabaye mu 1972 biri mu mateka ababaje yaranze akarere k’ibiyaga bigari kandi bikwiye kwibukwa no guhabwa agaciro mpuzamahanga.”
RDC iravuga ko mu Burundi habaye Jenoside yakorewe Abahutu, mu gihe inzego zirimo Umuryango w’Abibumbye utaremeza ko ubwicanyi bwo mu 1972 ari Jenoside.
